തിരുവനന്തപുരം: കേരള പി.എസ്.സിയിലെ ക്രമക്കേടുകളിൽ നടപടി സ്വീകരിക്കുന്നതിനു പകരം ഉത്തരവാദികളെ സംരക്ഷിക്കുന്ന നിലപാടാണ് സംസ്ഥാന സർക്കാർ സ്വീകരിക്കുന്നതെന്ന് വി. മുരളീധരൻ എം.എൽ.എ. ഗവർണറുടെ നടപടിയെ സി.പി.എം എതിർക്കുന്നത് സ്വാഭാവികമാണെങ്കിലും കോൺഗ്രസും യു.ഡി.എഫും അതിനെ എതിർക്കുന്നതിന്റെ യുക്തി മനസ്സിലാകുന്നില്ലെന്നും അദ്ദേഹം പറഞ്ഞു.
പി.എസ്.സി ക്രമക്കേടുകളുമായി ബന്ധപ്പെട്ട് സംസ്ഥാന പോലീസ് മേധാവിക്ക് ഇതുവരെ 180 പരാതികൾ ലഭിച്ചിട്ടുണ്ടെന്നും ഉദ്യോഗസ്ഥ ഭരണപരിഷ്കാര വകുപ്പ് മുഖേന ലഭിച്ച മൂന്ന് പരാതികൾ ക്രൈംബ്രാഞ്ച് അന്വേഷണത്തിനായി ആഭ്യന്തരവകുപ്പിന് കൈമാറിയിട്ടുണ്ടെന്നും മുഖ്യമന്ത്രി തന്നെ ഇന്ന് നിയമസഭയിൽ വ്യക്തമാക്കിയിട്ടുണ്ട്. ഇത്രയധികം പരാതികൾ ഉയർന്ന സാഹചര്യത്തിൽ ക്രമക്കേടുകൾ അന്വേഷിക്കാനും ഉത്തരവാദികൾക്കെതിരെ നടപടി സ്വീകരിക്കാനും സർക്കാർ തയ്യാറാകണം.
പരാതികളുടെ അടിസ്ഥാനത്തിൽ ഓഗസ്റ്റ് 21-ന് പി.എസ്.സി സെക്രട്ടറിയോട് ഗവർണർ വിശദീകരണം തേടിയിരുന്നതായാണ് മനസ്സിലാക്കുന്നത്. ഇതിന്റെ തുടർച്ചയായാണ് രാഷ്ട്രപതിക്ക് ശുപാർശ നൽകിയിരിക്കുന്നത്. ഗവർണറുടെ നടപടിയിൽ ഭരണഘടനാവിരുദ്ധതയുണ്ടെന്ന് ഭരണപക്ഷവും പ്രതിപക്ഷവും ആരോപിക്കുന്നുണ്ടെങ്കിലും അതിന്റെ അടിസ്ഥാനമെന്താണെന്ന് വ്യക്തമാക്കണം.
ക്രമക്കേടുകളിൽ നടപടി സ്വീകരിക്കേണ്ട സമയത്ത് പരസ്പരം സംരക്ഷിക്കുന്ന സമീപനമാണ് ഭരണപക്ഷവും പ്രതിപക്ഷവും സ്വീകരിക്കുന്നതെന്ന് കോടതി കഴിഞ്ഞ ദിവസം രൂക്ഷമായി വിമർശിച്ചിരുന്നു. എന്നിട്ടും സർക്കാർ നിലപാടിൽ മാറ്റമില്ലാത്തത് ജനങ്ങളോടുള്ള വെല്ലുവിളിയാണ്.
ഇടതുസർക്കാരിന്റെ കാലത്ത് പി.എസ്.സി വഴി നടന്ന എല്ലാ നിയമനങ്ങളെക്കുറിച്ചും സമഗ്രമായ അന്വേഷണം നടത്തുക, നിയമനങ്ങൾ പുനഃപരിശോധിക്കുക, മുഖ്യപ്രതികളെ ചോദ്യം ചെയ്യാൻ പോലും തയ്യാറാകാത്ത സർക്കാർ നിലപാട് തിരുത്തി ക്രമക്കേടുകൾക്ക് ഉത്തരവാദികളായവർക്കെതിരെ നടപടി സ്വീകരിക്കുക എന്നീ ആവശ്യങ്ങൾ സർക്കാർ അടിയന്തരമായി നടപ്പാക്കണം. പി.എസ്.സിയുടെ വിശ്വാസ്യത വീണ്ടെടുക്കാൻ ഈ നടപടികൾ അനിവാര്യമാണെന്നും വി. മുരളീധരൻ പറഞ്ഞു.
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ