പെട്രോൾ-ഡീസൽ വിൽപ്പനയിലെ താൽക്കാലിക നിയന്ത്രണങ്ങൾ പിൻവലിച്ച് കേന്ദ്ര സർക്കാർ

ന്യൂഡൽഹി: പെട്രോളിന്റെയും (Motor Spirit) ഹൈ സ്പീഡ് ഡീസലിന്റെയും (High Speed Diesel) വിൽപ്പനയിലും വിതരണത്തിലും ഏർപ്പെടുത്തിയിരുന്ന താൽക്കാലിക നിയന്ത്രണങ്ങൾ കേന്ദ്ര സർക്കാർ പിൻവലിച്ചു. പൊതുമേഖലാ എണ്ണ വിപണന കമ്പനികളുടെ (Oil Marketing Companies) റീട്ടെയിൽ ഔട്ട്‌ലെറ്റുകൾ വഴിയുള്ള വിൽപ്പനയ്ക്ക് ബാധകമായിരുന്ന നിയന്ത്രണങ്ങൾ 2026 ജൂലൈ 1 മുതൽ പ്രാബല്യത്തിൽ നിന്ന് ഒഴിവാക്കുമെന്ന് പെട്രോളിയം, പ്രകൃതിവാതക മന്ത്രാലയം അറിയിച്ചു. പശ്ചിമേഷ്യൻ പ്രതിസന്ധിയെ തുടർന്നുണ്ടായ വിതരണ വെല്ലുവിളികൾക്കിടെ അന്താരാഷ്ട്ര വിപണിയിൽ ഇന്ധനവില ഉയർന്നെങ്കിലും, രാജ്യത്തെ ഉപഭോക്താക്കളെ സംരക്ഷിക്കുന്നതിനായി പെട്രോളിന്റെയും ഡീസലിന്റെയും ചില്ലറവില സർക്കാർ സ്ഥിരമായി നിലനിർത്തിയിരുന്നു. ഇതോടെ റീട്ടെയിൽ വിലയും ബൾക്ക് ഉപഭോക്താക്കൾക്കുള്ള വിലയും തമ്മിൽ വലിയ വ്യത്യാസമുണ്ടാകുകയും ചില വ്യവസായ, വാണിജ്യ, സ്ഥാപന ഉപഭോക്താക്കൾ റീട്ടെയിൽ പമ്പുകളിൽ നിന്ന് ഇന്ധനം വാങ്ങാൻ തുടങ്ങുകയും ചെയ്തു. ഇതിലൂടെ ഇന്ധന ദുരുപയോഗം, പൂഴ്ത്തിവെപ്പ്, കരിഞ്ചന്ത തുടങ്ങിയ പ്രവണതകൾ റിപ്പോർട്ട് ചെയ്യപ്പെട്ടു. ഇതിനെ തുടർന്ന് 2026 ജൂൺ 12 മുതൽ റീട്ടെയിൽ പമ്പുകളിൽ ഒരു ഉപഭോക്താവിനോ വാഹനത്തിനോ പ്രതിദിനം പരമാവധി 200 ലിറ്റർ ഡീസൽ മാത്രമേ നൽകാവൂ എന്ന നിയന്ത്രണം സർക്കാർ ഏർപ്പെടുത്തിയിരുന്നു. കൂടാതെ വ്യവസായ, സ്ഥാപന, വാണിജ്യ ആവശ്യങ്ങൾക്കുള്ള ഇന്ധനം നിർദ്ദിഷ്ട കൺസ്യൂമർ പമ്പുകൾ വഴി മാത്രം വാങ്ങണമെന്നും നിർദേശിച്ചിരുന്നു. രാജ്യത്തെ പെട്രോളിയം ഉൽപ്പന്നങ്ങളുടെ വിതരണ സാഹചര്യം പുനഃപരിശോധിച്ച ശേഷം നിലവിൽ സ്ഥിതി സാധാരണ നിലയിലായതിനാൽ ഈ താൽക്കാലിക നിയന്ത്രണങ്ങൾ ഇനി ആവശ്യമില്ലെന്ന് സർക്കാർ വിലയിരുത്തി. അതിന്റെ അടിസ്ഥാനത്തിൽ ജൂൺ 12-ലെ ഉത്തരവ് ജൂലൈ 1 മുതൽ പിൻവലിക്കുകയായിരുന്നു. ഈ നിയന്ത്രണങ്ങൾ നിലവിലുണ്ടായിരുന്ന കാലയളവിൽ രാജ്യത്തുടനീളം പെട്രോളിന്റെയും ഡീസലിന്റെയും ലഭ്യത ഉറപ്പാക്കാനും ചില്ലറ ഉപഭോക്താക്കളുടെ താൽപര്യം സംരക്ഷിക്കാനും കഴിഞ്ഞതായി മന്ത്രാലയം വ്യക്തമാക്കി.