ഇന്ത്യൻ ചലച്ചിത്രമേഖലയ്ക്ക് കരുത്തേകാൻ കേന്ദ്ര സർക്കാരിന്റെ രണ്ട് സുപ്രധാന തീരുമാനങ്ങൾ

ഇന്ത്യൻ ചലച്ചിത്രമേഖലയ്ക്ക് കരുത്തേകാൻ കേന്ദ്ര സർക്കാരിന്റെ രണ്ട് സുപ്രധാന തീരുമാനങ്ങൾ ന്യൂഡൽഹി: ഇന്ത്യൻ ചലച്ചിത്രമേഖലയുടെ വളർച്ചയ്ക്കും രാജ്യത്ത് കൂടുതൽ സിനിമാ തിയേറ്ററുകൾ സ്ഥാപിക്കുന്നതിനുമായി കേന്ദ്ര വാർത്താവിതരണ-പ്രക്ഷേപണ മന്ത്രാലയം രണ്ട് സുപ്രധാന തീരുമാനങ്ങൾ പ്രഖ്യാപിച്ചു. കേന്ദ്ര വാർത്താവിതരണ-പ്രക്ഷേപണ മന്ത്രി അശ്വിനി വൈഷ്ണവയുടെ അധ്യക്ഷതയിൽ ന്യൂഡൽഹിയിൽ നടന്ന ഉന്നതതല അവലോകന യോഗത്തിലാണ് ഈ തീരുമാനങ്ങൾ കൈക്കൊണ്ടത്. സിനിമാ നിർമ്മാണം, വിതരണം, സാങ്കേതികവിദ്യയുടെ പ്രയോജനം എന്നിവ ശക്തിപ്പെടുത്തുന്നതിനുള്ള ഘടനാപരമായ നടപടികൾ ഉടൻ സ്വീകരിക്കാൻ മന്ത്രി ഉദ്യോഗസ്ഥർക്ക് നിർദേശം നൽകി. ഉന്നതതല പഠനസമിതി രൂപീകരിച്ചു പ്രശസ്ത ഗാനരചയിതാവും സെൻസർ ബോർഡ് ചെയർമാനുമായ പ്രസൂൺ ജോഷി യുടെ അധ്യക്ഷതയിൽ ഉന്നതതല പഠനസമിതി രൂപീകരിച്ചു. ചലച്ചിത്ര വ്യവസായ വിദഗ്ധരും സാങ്കേതിക പങ്കാളികളും സമിതിയിൽ അംഗങ്ങളായിരിക്കും. ഇന്ത്യൻ സിനിമ നേരിടുന്ന വെല്ലുവിളികളും അവസരങ്ങളും പഠിച്ച് ആഗോളതലത്തിൽ ഇന്ത്യൻ സിനിമയെ കൂടുതൽ മത്സരക്ഷമമാക്കുന്നതിനുള്ള ശുപാർശകൾ സമിതി സമർപ്പിക്കും. കൃത്രിമ ബുദ്ധി (AI), വെർച്വൽ പ്രൊഡക്ഷൻ തുടങ്ങിയ പുതിയ സാങ്കേതികവിദ്യകളുടെ പ്രയോജനം, സിനിമാ നിർമ്മാണത്തിനും വിതരണത്തിനുമുള്ള ധനസമാഹരണ മാർഗങ്ങൾ, സംസ്ഥാന സർക്കാരുകളുമായുള്ള ഏകോപനം എന്നിവയും സമിതി പരിശോധിക്കും. മൂന്ന് മാസത്തിനകം റിപ്പോർട്ട് മന്ത്രാലയത്തിന് സമർപ്പിക്കാനാണ് നിർദേശം. സംസ്ഥാനങ്ങൾക്കായി മാതൃകാ സിനിമാ ചട്ടങ്ങൾ സിനിമാ തിയേറ്ററുകളുടെ നിയന്ത്രണം സംസ്ഥാന വിഷയമായതിനാൽ വിവിധ സംസ്ഥാനങ്ങളിൽ വ്യത്യസ്ത നിയമങ്ങളാണ് നിലവിലുള്ളത്. ഇത് പ്രത്യേകിച്ച് ചെറുപട്ടണങ്ങളിലെയും ഗ്രാമപ്രദേശങ്ങളിലെയും പുതിയ തിയേറ്ററുകളുടെ വികസനത്തിന് തടസ്സമായിരുന്നു. ഇത് പരിഹരിക്കുന്നതിനായി വിവിധ പങ്കാളികളുമായി ചർച്ച നടത്തിയ ശേഷം മന്ത്രാലയം 'മോഡൽ സ്റ്റേറ്റ് സിനിമ റെഗുലേഷൻസ്' തയ്യാറാക്കി എല്ലാ സംസ്ഥാന സർക്കാരുകൾക്കും കൈമാറി. ഈ മാതൃകാ ചട്ടങ്ങൾ സംസ്ഥാനങ്ങൾ സ്വീകരിക്കണമെന്നും നടപ്പാക്കുന്നതിന് കേന്ദ്ര സർക്കാർ ആവശ്യമായ സഹായം നൽകുമെന്നും മന്ത്രാലയം അറിയിച്ചു.